Escòla

Istòria de l'escòla :

La Calandreta deu Seuvestre que vadó en 2003 de la volontat de transméter la lenga occitana aus mainats en un environament pedagogic on se pòt espelir l’escolan. En purmèr, amassadas d’informacions qu'estón organizadas a l’atencion deus pairs deus mainats de mensh de 5 ans deu canton d'Arzac e deu parçan tà’us presentar lo projècte. D'aquí a, chic a chic, lo projècte que prenó còs e l’instància confederau deu movement Calandreta que validè la creacion d’ua Calandreta a Porciuvas-Bocoa.

Qu’arcuelhèva a l’epòca 4 mainats de 2 e 3 ans.


Effectius :
La Calandreta deu Seuvestre qu'arcuelh uei 28 mainats, de la tota petita seccion de mairau au CM2. Los mainats qui la frequentan que vienen deus cantons d’Arzac, Garlin e Gèuna.

Còla pedagogica :
- Karine Bordenave : ensenhaira CP au CM2 e cap d’establiment

- Stéphanie Vaissière-Duhourcau : ensenhaira classas de mairau

- Julie Lafitte : ASEM

- Maryline Frézier : agent d’arcuelh peri-escolar, de restauracion e d’entertien, ajuda a la comunicacion

Pedagogia :

La Calandreta qu’ei ua escòla obèrta a tots, a gratis e laïca.

Que respècta los programas oficiaus de l'educacion Nacionau e que perpausa tà s’i escàder ua demarcha immersiva.

Los mainats que son arcuelhuts un còp hèit dus ans. Aquò que permet d’installar las condicions d’un vertadèr bilingüisme prendiu.

Ad aqueste atge, l’inscripcion que's hè au cas per cas, en foncion de la maturitat deu mainat (destacament pairau, netetat …) ;

La Calandreta qu’emplega lo metòde d’immersion lingüistica a partir de la mairau tà valorizar e desvolopar las capacitats deus mainats hèra joens a aquesir ua dusau lenga.

Atau la lenga occitana qu’ei la lenga d’aprentissatge e la lenga de la vita de l’escòla, medish en dehòra deus moments simplament pedagogics (recreacion, restauracion escolara, arcuelh peri-escolar). Lo francés qu’ei integrat progressivament a comptar deu CE1, autanlèu que la lectura e l’escritura en occitan son aquesidas.

L’objectiu qu’ei qu’en fin deu cicle 3 (CM2), lo mainat mestregi perfèitament las 2 lengas autant a l’escriut com a l’orau.

A la Calandreta, la practica d’un bilingüisme prendiu qu’obreish naturaument a las autas lengas e culturas romanicas e a totas las autas.

La Calandreta que reïvindica l’utilizacion de la pedagogia activa (inspirada deus pedagògas Célestin Freinet e Fernand Oury) de faiçon a balhar la paraula au mainat, a'u rénder autonòme, a regular la vita deu grop e l’utilizar com vector d’aprentissatge. 

Qu’utiliza institucions e utís pedagogicas que van en aqueste sens :

-   Lo « Qué de nau ? » : moment d’escambi enter los mainats, on cadun conta çò qu’a hèit o viscut ;

- Lo « Conselh » : a cada conselh, un president qu’ei nomat e qu’ei eth que gavida lo conselh, en balhar la paraula aus autes mainats. Los mainats qu'i deven respectar règlas : lhevar la man tà demandar la paraula, non pas copar la paraula aus autes, escotar-los, non pas trufà’s ;

- Lo « Bilanç meteo » : a la fin deu dia, los mainats qu’avaloran per un gèste lo dia que vienen de passar : man obèrta tau só o man barrada tà l’auratge ;

- Los « talhèrs » : los mainats que causeishen l’activitat que desiran har au demiei de mantuas qui’us son perpausadas ;

- Las « cintas » : que remplaçan lo sistèma d’evaluacion per nòtas, e que permeten aus mainats de s’auto-avalorar e de valorizar los lor aquesits ;

Exemple de cintas de comportament taus escolans de mairau

- Los « batalaires » (lo jornau de l’escòla) : qu’ei un jornau sancerament creat en classa, peus mainats ;

- ...

Oraris :

Cors

Los cors que’s debanan de 9h a 12h e de 13h30 a 16h30. Los mainats que pòden estar arcuelhuts a l’escòla de 8h50 a 12h e de 13h30 a 16h45 devath la responsabilitat de l’ensenhaira. En dehòra d’aquestes oraris, que son arcuelhuts en arcuelh periscolar.

Cantina

Lo repaish deu mieidia qu’ei pres dens la petita sala deu larèr municipau a comptar de mieidia  devath la susvelhança de 2 adultes, l’ajuda mairau e l’ajuda de restauracion escolara. Los repaishs que son hornits peu collègi d'Arzac.

Arcuelh periscolar

L’arcuelh periscolar que’s debana dens la petita sala de la cantina.

Abans la classa a comptar de 8h.

Après la classa dinc a 18h.


Calandretas (escòlas) e  calandrons (escolans) : d’on vienen aquestes mots ?

Qu’ei Anne-Marie Roth (a l’origina de la creacion de las calandretas) qui trobè aquestes mots. Lo tèrme « Calandreta » que designa tà començar un petit ausèth : Calandreta.
« Qu’ei a Montalhon qu’ei vadut lo nom de Calandreta. Quan èri petita, en sortir de l’escòla, qu’observavi las calandretas qu'anóncian l’entrada deus beròis dias e qu’ei com aquò qu’ei avut l’idea d’aperar las escòlas occitanas Calandreta ». Per associacion, Calandreta qu'anóncia la prima de la lenga occitana.