L’arribada en cap d'un beròi projècte collectiu !
Los associatius de l'escòla calandreta que cercavan un produit originau a perpausar a la venta entà's desmarcar deus tradicionaus calendaris e autes. Qu'ei causa hèita !
Un an a, que germiè l'idea de crear un liberet de recèptas mercés au succès encontrat per la venta de pastisserias de casa hèitas au moment de las divèrsas animacions deu canton.
Tant los calandrons com los parents e la Regenta que s'investín en aqueste projècte collectiu.
A tor passat e cadun la soa mission. Las familhas tà redigir ua recèpta, la realizar e la fotografiar ; los mainats la tòca suu cap tà las illustracions e la regenta tà tot lo tribalh de traduccion en biarnés, l'occitan d'ací.
Dab tot aquesta mestior un tribalh de mesa en fòrma que seguí, puish lo tornar léger e enfin la validacion definitiva deu bon a tirar. Be n'a calut anar e tornar enter los associatius exigents e determinats a sortir un beròi objècte !
L’impression deus liberets qu'estó hidat a un estampaire locau qui a pres lo projècte a de bonas e n' a sublimat lo rendut.
Lo resultat qu'ei a la pagèra de l'engatjament de cadun : un liberet de 30 recèptas , en recto-verso francés-occitan tot en color e beròi illustrat.
Tòstas, entradas, plats e dessèrts, aisits e mei mauaisits : de qué encantar tots los cosinèrs autant amators com confirmats.
Ua beròja idea de present tà la hèsta de las mairs (o la hèsta deus pairs) qui s'aprèssa !
Tà tot rensenhament o tota comanda :
contactar Midou au 06 31 07 63 13 o un pair de calandron
La visita a l'estamperia
Ua petita delegacion de l'escòla qu'avó l'escadença de participar a l'aviada de l'impression deu liberet de recèptas. Lo parat tad eths de descobrir lo monde de l'estamperia e las diferentas etapas de la realizacion. Un saut enter duas epòcas, la deus utís modèrnes e la de las bonas vielhas gròssas maquinas de 50 ans a.
L'escòla que merceja regde l'estamperia de Navarra de l'aver obèrt las pòrtas e l'ensemble deus emplegats per aver pres lo temps d'explicar lo foncionar deus diferents utís e tecnicas de fabricacion. Ua beròja generositat de transmission de sabers.
L'escòla que merceja tanben Corinne Poulot-Cadet d'Eti&Co per la soa implicacion dens l'arribada en cap e l'escaduda deu projècte.
Lo mot deus co-presidents de l'associacion (Laurence Kramdi e Midou Curmer) :
"Havòla, havòla, que's plea la sacòla" (Petit à petit, l’oiseau fait son nid)
Ua associacion que viu sonque de las envejas deus sons membres, de la lor creativitat e de la lor perseverança. Las causas que's hèn chic a chic. Qu'ei çò qui ns'ensenha aqueste arreproèr gascon.
Chic a chic las ideas que prenen fòrma, que convencen adarron puish que's concretizan pas a pas.
B'ei agradiu de sentir qu'ua idea ei portada a l'unisson ! B'ei agradiu de sentir los promotors arrapà's mes après mes tà la realizar ! A còps, lo dobte que gaha puish la maquina que torna partir.
Inutile de voler bruslar las etapas. La precipitacion que seré maishanta conselhèra. De la lenta maturacion que vaderà lo sòcle solide suu quau tota l'associacion poderà pausar un pè segur.
Aqueth petit liberet, per tant petit que sia, conta solet la hidança que los membres de l'escòla an los uns taus autes. Que testimonia tota l'importància qui ei acordada a cada idea.
Aqueth petit liberet que simboliza lo sens qui liga l'escòla Calandreta deu Seuvestre : crear, avançar, encoratjà's, grandir dens la serenitat.
Òsca Céline tà la toa idea e la toa realizacion.
Aucun commentaire:
Enregistrer un commentaire