"Un cordon bleu” deu gran còr
Tà la tresau annada de reng,
la calandreta deu Seuvestre que vien d'organizar la soa pora borida lo 24 de
març a Lauret.
Au començar d'aquesta animacion, los pairs de
calandrons que demandèn l'ajuda de Simone Larrieu, coneishuda suu parçan peus
sons talents de cosinèra e principaument per la soa especialitat, la pora
borida.
Aqueste plat, cèrtas, per
estar tradicionau deu Bearn, n'ei pas per autant aisit de confeccionar.
Autanlèu la velha au matin,
que cau estar au combat en cosina : obrir, farcir, tornar cóser.
Las 2 purmèras annadas, los
pairs de calandrons, novicis que compausèn la brigada deu capdau Simone.
Mes tà l'edicion 2013, la
cosinèra deu còr gran, qu'a tienut a har mei, en liurar los secrets de la soa
recèpta, etapa per etapa.
Dab paciéncia, que guidè los pairs aprentís
cosinèrs , explicant, en har la demostracion.
Lo resultat : ua pora borida
enqüèra mei bona que las autas annadas mercès a l'apeçatge de dus ingredients
irremplaçables : lo partatge e la transmission.
Un beròi exemple taus
calandrons aus quaus, pairs e regents an tostemps avut au còr d'ensenhar
l'importància d'aquestas duas valors.
Los associatius de la Calandreta deu Seuvestre que
remercian hèra Dauna Simone tau son investiment dens l'escaduda d'aquesta
animacion, tà la soa generositat e lo son vam.
L'an qui vien qu'ei a la taula de las convivas
qu'espèran arcuélher Simone, qui trocarà lo son ròtle de cosinèra tau ròtle de
conviva d'aunor. Jogam que los aprentís cosinèrs e's saberàn amuishar a la hautor de
l'inestimable eretatge transmetut tan generosament per aquesta dauna
excepcionau.
Aucun commentaire:
Enregistrer un commentaire