L'Escapolaire

L'escapolaire ... Quan los adultas segueishen los mainats suu camin de la lenga regionala

Los purmèrs calandrons qui integrèn l’escòla quan obrí batlèu 10 ans a, que son vaduts grans desempuish. 

Lo mei atjat, Matèu Richard, qu’ei partit en classa de sheisau a la rentrada darrèra, en seguir lo son cursus au Collègi de Gasconha Calandreta de Pau. 

A la fin deu son CM2, que passè lo son purmèr examenh e que l'avó : lo diplòma d’Escapolaire. 

Creat en 2002, qu’ei un diplòma oficiau, definit per lo cadre europèu commun de referéncia  tà las lengas. 

Tres autes « grans » de l’escòla que l’an tanben passat : Tom Curmer qui l'avó en junh de 2011 ; Danis Richard e Alexine Baylocq que vienen de'u passar e qu’auràn la resulta en junh. 

Aqueste examenh  n’ei pas sonque taus calandrons ; tota persona qui vòu testar las soas competéncias en occitan que pòt presenta’s com candidat liure. 

Atau, Laurence Caillet, anciana ASEM de l’escòla, qu’ei diplomada ; tot com Midou Curmer, President de la Calandreta deu Seuvèstre e pair de tres calandrons (deus quaus Tom). Totun, arren dens las loas originas ne'us destinava a l’usatge deu bearnès : Laurence, vaduda a Paris, e Midou en Borgònha. Qu’ei la pròva que la nosta beròja lenga que sap plàser e dar enveja de l’apréner, hòrt mei luenh que las fronteras deu Bearn ! 

Au lor darrèr, Sabine Baylocq, dinerèra de l’escòla e mair de tres calandrons (deus quaus Alexine), Céline Arramounet, secretària de l’escòla e mair d’una petita calandrona, e Stéphanie Vaissière-Duhourcau, ASEM aqueste an, que’s son inscriutas tà la session qui vien qui’s debanarà lo 30 de junh de 2012, a partir de 8 òras e mieja au Castèth d'Este de Vilhèra, dens los locaus de l’Institut Occitan. 

Dilhèu d’autes pairs o membres de l’associacion que van seguir-las dens aquesta aventura.

Tà tot rensenhament o inscripcion ad aqueste examenh:

contactatz lo Centre de Formacion Professionala en lenga e culturas occitanas d’Ortès 

Tel : 05 59 67 20 75.